Arba Sicula è na sucietà internazziunali senza scopu di lucru ca havi comu obbiettivu la promozioni dâ lingua e dâ cultura siciliana. Fa chissu ntê modi siguenti:
pubblicannu libbra
Legas è orgugghiusa di annunziari la pubblicazioni di Learn Sicilian II, un libbru di testu p’un corsu universitariu di secunnu annu. Chiù dâ grammatica e dî esercizi, Learn Sicilian II aiuta ê studenti a costruiri lu vocabbulariu spiegannu comu si formanu li palori siciliani, comu usari li prifissi e li suffissi e comu li palori nglisi currispunnunu ê palori siciliani. Scrittu completamenti in sicilianu, lu novu libbru discrivi e spiega ognuna dî parrati siciliani, li differenzi ntâ lingua parrata ca si senti mentri si viagga pi l’isula. Pi illustrari li differenzi, lu libbru cunteni campiuni dî varii pruvinci. E furnisci na serii di reguli ca nzigna ê studenti comu cumprenniri li differenzi ntrî parrati e comu ricanusciri ognunu.
Learn Sicilian II veni c’un CD ca cunteni n’antologia bilingua siciliana, l’audio pî selezioni, risposti ê esercizi e li Soni dû Sicilianu. In alternativa c’è puru na virsioni elettronica dû libbru ca cunteni lu testu cumpletu e lu CD ca accumpagna la virsioni stampata, ncurpurata ntô PDF.
Cliccati ccà pi accattari na copia dû libbru stampatu dâ Libbraria Legas. O cliccati ccà pi accattari la virsioni elettronica. E putiti cliccari ccà pi na discrizioni chiù longa e pi vidiri l’innici di Learn Sicilian II.
pubblicannu libbra
Legas è orgugghiusa di annunziari la pubblicazioni di na nova edizioni di Learn Sicilian/Mparamu lu sicilianu di Gaetano Cipolla, na grammatica siciliana interattiva. La nova edizioni curata di lu prufissuri Alfonso Campisi di l’università La Manouba di Tunisi fu stampata a Palermu. Lu titulu è Mparamu lu sicilianu: un corso interattivo per apprendere il siciliano. Lu libbru è uguali a la virsioni nglisi sulu ca li reguli e li direzzioni pi li studenti sunnu scritti in talianu.
Stu volumi di 326 paggini veni cu un DVD ca cunteni na guida cumpleta di la pronunzia di lu sicilianu, li risposti a li esercizzii chiù mpurtanti e l’audiu di tutti li litturi, dialoghi e matiriali culturali di lu libru. Esistunu puru virsioni elettronichi di li du libbra, sia chidda in nglisi ca chidda in talianu. La virsioni elettronica cunteni li testi comu a li libbra di carta ma puru li registrazioni cu li dialoghi e li risposti a li esercizzii, tuttu nta un sulu DVD.
Pi accattari la virsioni nglisi, cliccati ccà. Pi accattari la virsioni elettronica, cliccati ccà o scriviti a legasbooks2021@outlook.com. Si abitati in Italia, pi accattari copii di carta di la virsioni taliana, scriviti a Nuova Ipsa Editore, via Giuseppe Crispi, 50, 90144 Palermo, telefonu 091 681 9025 o scriviti a info@nuovaipsa.it. E putiti leggiri l’innici di Mparamu lu sicilianu cliccannu ccà.
organizzannu cunfirenzi e reciti di puisia siciliana
Arba Sicula organizza cunfirenzi, reciti e spittaculi tiatrali a l’ Università St. John’s, a l’ Italian Charities of America e ad àutri posti. Di sutta ci sunnu lijami a video cu puisìi recitati e traduzioni di Gaetano Cipolla:
Pi riciviri inviti pi sti eventi, mannati lu vostru indirizzu elettronicu ô prufissuri Cipolla scrivennu a: legasbooks2021@outlook.com.
pubblicannu Arba Sicula
Na rivista bilingui sicilianu/nglisi ca illustra a littiratura, l’arti, a storia, a cucina e u folklori dâ Sicilia. Chist’annu celebramu u quarantesimu annivirsariu dâ funnazioni di Arba Sicula (1979-2019). A rivista nesci na vota l’annu e pubblicamu un numiru doppiu. Cliccati supra a rivista pi vidiri l’indici e pi leggiri tutti li articuli di stu numiru. Normalmenti mintemu ccà un numiru passatu. Pi riciviri lu numiru currenti, abbunativi a Arba Sicula. Ntô 2019 criammu un CD ca cunteni tutti li 42 numira di Arba Sicula. Lu CD havi un indici generali organizzatu pir rubrichi (puisia, narrativa, tradizioni, a nostra lingua, ecc.) e si po’ navigari cliccannu cu lu surici supra li tituli. Lu CD costa $30.00 e si pò accattari mannannu un assegnu a Arba Sicula pir $34.00: PO Box 149, Mineola, NY 11501.
pubblicannu Sicilia Parra
Na rivista semiannuali di vinti paggini ca illustra li attività dâ nostra sucietà. È scritta principalmenti in nglisi cu una o du paggini didicati ô sicilianu. Pi vidiri l’indici dû numiru passatu e pi putiri visiunari tutti li articuli, cliccati supra la rivista. Ntô 2019 criammu un DVD ca cunteni tutti i 62 numira pubblicati dû 1989 finu ô 2019. Lu DVD si pò acquistari pir $30.00 l’unu, ma si v’accattati lu CD di Arba Sicula e lu DVD di Sicilia Parra nzemmula pir $64.00 vi mannamu gratis lu distintivu pir li 40 anni di Arba Sicula ca normalmenti costa $10..
pubblicannu libbra supra a Sicilia e i Siciliani
I libbra sunnu a megghiu arma c’avemu pi contrabbattiri ddi stupidi stiriotipi dâ genti siciliana promossi dà mass media. E’ nicissariu fari canusciri a tutti la vera natura dû populu sicilianu e dî so granni contribbuti a civiltà occidintali. Chiossai sapemu dâ nostra storia, megghiu putemu cummattiri l’ignoranza ca fa nasciri ddi stiriotipi.
Stu catalogu PDF cunteni na lista dî libbra ca uffremu. Ci sunnu assai nuvità, comu lu novu testu avanzatu Learn Sicilian II. Putiti accattari li libbra direttamenti dâ nostra libbraria online. A la cascia, putiti pagari cu na carta di creditu o debitu, pagari cu PayPal o effettuari un ordini telefonicu. E vi spidemu li libbra pi menzu di la posta (USPS).
Putiti puru accattari libbra e pagari l’abbunamentu annuali a PayPal. Avennu trasutu, cliccati su “send money” e mannati a legasbooks2021@outlook.com. Pi favuri, lassati na discrizioni dû vostru ordini ntô modulu.
organizzannu giti di Sicilia pî nostri soci
I giti di Arba Sicula nun sunnu comu a l’autri organizzati dà aginzii cummirciali. I nostri sunu disignati pi genti ca havi un granni interessi e sintimenti speciali pâ Sicilia. I nostri visiti sunnu esperienzi speciali, viaggi di scuperta. Pi vidiri l’itinerariu di lu prossimu viaggiu e pi leggiri n’articulu ca descrivi li eventi chiù impurtanti cliccati ccà.