General

Dichiarazioni di lu Scopu

ARBA SICULA é, prima di tuttu, la riflissioni in ritardu, di na nicissitá sintuta di na cumunitá etnica stabiluta nni li Stati Uniti d’America pi difiniri, prisirvari e difúnniri la nostra antica ereditá p’assicurari la so vera supravvivenza. Mentri ca l’orientazioni nostra é littiraria, lu nostru métudu é storicamenti evucativu cu l’intinzioni di nun passari supra nuddu aspettu di la cultura Siciliana comu indignu di la nostra esaminazioni e análasi. Lu scopu di stu sforzu é, allura, di riscupriri zoccu é ligittimamenti nostru ntra tuttu lu sintasi d’un populu isulanu pussidennu rádichi nni l’espirienzi storichi Siciliani, Italiani e Americani e macari ligami chiú antichi cu tutti li nazioni di lu Meditirraniu.

Circamu la canuscenza d’un senzu di cuntinuazioni ntra nui stissi, e picchissu amu pigghiatu un simbulu anticu di li Siculi (la stirpi principali in Sicilia prima di lu stabilimentu di li Grechi) pi suttaliniari la seriitá di lu nostru scopu e pi marcari nni li menti di la juvintú nostra un signu di l’antichitá di la so ereditá. Nui semu, prima di tuttu, intirissati ca la chiavi di l’arma Siciliana (la lingua di li nostri avi) fussi cunsirvata e studiata cu preggiu e attinzioni.

Pi la fini di rializari st’intinzioni, ARBA SICULA invita a tutti ca ponnu vantari armenu un avu Sicilianu, a unirisi cu nui in un sforzu culittivu pi aumintari la canuscenza di la nostra stissa ereditá.

Stu disignu é pigghiatu di na midagghia d’urnamentu ca nchiudi na specia di cruci dicurativa. Un esemplari si trova nni lu Museu di Siracusa Fu truvata a San Cataldu e fa parti di l’Adrano Hoard, la chiú granni cugghiuta d’uggetti di brunzu ca á statu truvata in Sicilia. Lu disignu é di circa 1300 anni avanti Cristu, di la civilitá Sicula.

Ristampammu ntâ pagina precedenti a dichiarazioni dû scopu accussí comu fu scritta ntô primu numiru di Arba Sicula ntô 1979. A copiammu esattamenti comu fu scritta senza fari currezioni. Comu si vidi a lingua canciau nanticchia, semu forsi chiù attenti a comu scrivemu in sicilianu, ma mi pari ca in linia di massina a’ma statu fidili a l’ideali espressi nta sta dichiarazioni. Si canciau l’edituri, non canciau u disidderiu di travagghiari pi ddi stissi motivi ca ficiru nasciri a nostra società.

Forsi avissi a fari na brevi storia da nostra associazioni pi soci ca sunu novi e oramai sunu sparsu in tuttu u munnu. Arba Sicula fu funnata nto 1979 di un gruppittu di siculo-americani di Brooklyn tra cui Gaetano Giacchi, Joseph Palisi, Alissandru Caldieru, Sebastianu Passioni, Mons. Santi Privitera e Mons. Anthony Failla e autri ca si riunevanu nta parrocchia di St. Finbar’s a Brooklyn. Chisti si putissiru cunsiddirari i soci funnaturi dâ società, anchi si giustamenti u titulu di funnaturi spetta a Gaetano Giacchi ca fu ô principiu chiddu ca chiù di tutti travagghiò pi purtari avanti l’organizzazioni.

I presidenti dâ nostra associazioni hannu statu chisti: Joseph Palisi, 1979-1980; Gaetano Giacchi, 1980-1987; Mons. Santi Privitera, 1987; Charles Cappellino, 1987-8; e Gaetano  Cipolla, dû 1988-finu a ora. L’edituri di Arba Sicula hannu statu sulu dui: Alissandru Caldieru dû 1979 fina ô 1986 e Gaetano Cipolla dû 1987 finu a oggi. L’autra nostra pubblicazioni, Sicilia Parra, ca durau pi na para d’anni, fu edita di John Randazzo, dâ sedi di Los Angeles. A secunna serii di Sicilia Parra cuminciau ntô 1989 e cuntinua finu a ora cu Gaetano Cipolla comu diritturi e Henry Barbera comu Co-diritturi. Comu sapiti, Henry muriu l’annu scorsu e ora i rispunsabbilità sunu tutti di Gaetano Cipolla. Ntâ prima fasi, Arba Sicula ebbi assai successu organizzannu reciti di puisii e programmi nta li chesi e nta li scoli. Però u numiru di soci non superau mai 800-900 pirsuni. Ci fu un piriudu di decadenza a causa di malatii e di autri cosi ca misi in piriculu l’organizzazioni ntô 1985-7.

Arba Sicula fu salvata grazzii a Mons. Santi Privitera e a Charles Cappellinu ca l’aiutarunu finanziariamenti e grazzii a Gaetano Cipolla ca prima si pigghiaiu a direzioni dâ rivista facennula maturari non sulu dû puntu di vista dâ grafica usannu u computer (i primi numiri si stampavanu cu na machina di scriviri manuali) ma  anchi pu cuntinutu e pâ lingua, e poi pigghiau a direzioni di l’organizzazioni. Arba Sicula ha crisciutu assai nta l’urtimi deci anni, non sulu pû numiru di l’abbunati, ma puru pi l’ottima riputazioni ca godi ntô munnu.

A società havi soci ca si trovanu principalmenti nta zona metropolitana di New York, ntâ California e poi ntâ tutti i Stati Uniti, macari nta l’Alaska e l’isuli Hawai. Tra i rivisti italiani, Arba Sicula è a rivista chiù populari d’America. A niautri nni pari picca cosa aviri chiù di dumila abbunati, picchí pinsamu ca i Siciliani d’America sunu assai numirusi e n’avissimu aviri 10,000 almenu! Ma l’autri rivisti specializzati si cunsiddiranu furtunati si hannu 300-400 abbunati. Nautra cosa: tanti rivisti stannu in circulazioni dui, tri anni e poi fallisciunu.

Arba Sicula chist’annu fa vintiduanni di vita. Vintiduanni di travagghiu pi dari o munnu n’idea chiù giusta dâ cultura siciliana e dî so contributi ô munnu. E’ un traguardu ca attravirsamu cu umiltà è cu granni cumpiacenza pi chiddu c’avemu fattu, ma puru câ spiranza ca putemu rializzari ancora assai dicchiù nta l’anni dû terzu millenniu.

Arba Sicula ha statu n’ispirazioni pi tanti Miricani d’origini siciliana. Annu dopu annu a’ma prisintatu u megghiu dâ cultura siciliana, dannucci mutivi di essiri orgogliosi di essiri Siciliani. Autri società siciliani hannu statu funnatu nta stu paisi e guardanu a niautri pi ispirazioni e sustegnu. Arba Sicula câ so luci illuminau a Sicilia e i Siciliani facennucci canusciri a tutti u megghiu latu d’iddi. Senza piccari di superbia, nta sti anni u nostru pisu s’ha fattu sentiri e pi chissu putemu essiri orgogliosi dî nostri contribbuti.