Tuttu lu libbru è scrittu in sicilianu. Comu libbru di testu, cunteni li reguli grammaticali e li esercizzii ca aiutanu a li studenti a ripassari la grammatica e a espanniri la so canuscenza. E scrivennu stu volumi, lu pruf. Cipolla vosi tuccari temi non esplurati ntô primu volumi, trattannu aspetti storici di la lingua e prisentannu ntirissanti piculiarità linguistichi ca si sentunu in certi paisi.

Un aspettu straurdinariu di stu volumi è lu trattamentu di li diffirenzi ca esistunu tra li varii parrati siciliani. Chistu è lu primu testu ca spiega comu funziona la variazioni diatopica in Sicilia. Lu libbru nun nzigna comu si parra a Missina o a Catania. Si voi nzignariti a parrari lu missinisi o lu catanisi, stu libbru ti aiuta, ma l’obbiettivu è chiddu di dari a li studenti li mezzi pi identificari li diversi parrati e di capiri ca lu sicilianu resta sempri na lingua. Infatti li diffirenzi ca si sentunu riguardanu sulu nta la lingua parrata, nun la lingua scritta.

Nautru aspettu mpurtanti di Learn Sicilian II è lu studiu di comu si formanu li palori siciliani. Mparannu a usari li prifissi, suffissi e ricanuscennu li currispunnenzi ntra li disinenzi nglisi e siciliani lu studenti junci cintinara di palori a lu so vocabbulariu. E pò applicari li reguli pi capiri palori ca non ha mai vistu prima. Na cosa surprinnenti ca emergi di lu studiu di li prifissi, suffissi e disinenzi è la nutevuli sumigghianza ca esisti tra lu sicilianu e lu nglisi ca risali a la cumuni dirivazioni di li du’ lingui dû latinu. (50% di li palori nglisi dirivanu di lu latinu) E lu testu dimustra sta dirivazioni cu tanti esempi.

Cu la pubblicazioni di lu secunnu volumi ora li studenti universitari hannu a sò disposizioni l’equivalenti di du’ anni di studiu. E cu stu secunnu volumi li studenti ponnu veramenti spicializzarisi in Studi Siciliani, cumminannu tali sequenza di du’ anni cu autri corsi di cultura, littiratura e storia siciliana.

Clicca ccà pi accattari na copia dû libbru stampatu dâ Libbraria Legas. O cliccati ccà pi accattari la virsioni elettronica.

TOC-Learn-Sicilian-II