traduzioni dâ recensioni di Primo Magazine (autunnu 2026)

Assai tempu prima ca Dante, Petrarca e Boccaccio stabilissiru li so posti ntra li giganti dâ littiratura taliana, un nutevuli esperimentu pueticu successi ntâ Sicilia. Â curti dû mpiraturi Federicu II, un gruppu di curtigiani dotti cuminciau a cumponiri versi raffinati in sicilianu anzicchì in latinu. Tra chisti spiccava Jacopu di Lentini, lu pueta generalmenti cunziddiratu l’autori di una di li nvinzioni chiù mpurtanti dâ littiratura: lu sunettu.

Ntô libbru Giacomo da Lentini’s Sonnets Retranslated into Sicilian, lu studiusu Gaetano Cipolla si mpegna in qualchi cosa di chiù ambizziusu di na simplici traduzioni d’un pueta midievali. Cerca di ridari a Jacupu di Lentini la so vuci siciliana.

Natu a Lentini, in Sicilia, di Lentini fu nutaru di Federicu II. Lu sò nomu appari nta documenti superstiti comu Notaro Jacomo. Cipolla lu metti ô centru dâ Scola Siciliana di Pueti ca çiurìu attornu â curti mpiriali di Federicu duranti la prima mità dû 13-esimu seculu.

Nfluinzati dâ tradizioni dî truvatori pruvinzali, li pueti siciliani eliminaru qualsiasi elementu musicali o performativu e raffinaru lu trattamentu di l’amuri romanticu. Lu sò sicilianu divintau na lingua littiraria mpurtanti. Cipolla cita lu ricanuscimentu di Dante di la mpurtanza dâ Scola. Susteni ca la sò influenza si sparsi a li pueti di lu “Dolce Stil Novo” e pur a Petrarca, a Boccaccio e ô Rinascimentu.

Doppu la morti di Federicu II ntô 1250 e la diminuzioni di la so nfluenza politica, li manuscritti originali dâ scola siciliana scumpareru in gran parti. Li puisii supravvissiru attraversu copii rializzati di scrivani, o amanuensi, a Firenzi, Pisa e Venezia. Cipolla susteni ca sti amanuensi nun si limitaru a cupiari lu sicilianu. Iddi adattaru li puisii a la propria lingua, di chiù cunziquenza ô toscanu.

D’accussì, li generazioni successivi nun liggevanu necessariamenti zoccu di Lentini avìa scrittu originalmenti.

Cipolla cunziddira lu problema quasi comu un archiologu littirariu. Partennu di li testi ca ristaru e dâ sò vasta canuscenza dû sicilianu, fa zoccu si putissi chiamari na traduzioni inversa pi ricostruiri la lingua, li soni e li ritmi ca la puisia di Jacupu forsi avissi pussidutu in origini.

Zoccu emergi è lu finominu canusciutu comu “rima siciliana”. Li rimi nta li testi di li traduzioni spissu non sunnu pirfetti. Cipolla susteni ca chista nun era la tecnica puetica dâ Scola Siciliana, ma na cunziquenza di li traduzioni dî versi siciliani in toscanu.

Li differenzi nta li sistemi vucalici e ntâ pronuncia trasfurmaru na rima siciliana pirfetta nta na rima toscana imperfetta. Zoccu li generazioni cunsiddiravanu na caratteristica dâ puisia siciliana era in fatti un erruri dirivatu di la traduzioni pirchì li rimi originali rimavanu pirfettamenti.

Lu libbru di Cipolla pirmetti ê litturi di esaminari li provi in prima pirsuna. Sta edizioni trilingui prisenta la puisia in sicilianu, nglisi e toscanu cu du’ canzuni e trenta sunetti. La giustaposizioni pirmetti ê litturi di vidiri – e, suprattuttu ntô casu dû sicilianu, di sentiri – li differenzi linguistichi ca Cipolla discrivi.

Li traduzioni nglisi di Cipolla nun sunnu sicchi rennimenti accademici. Cercanu di prisirvari lu lirismu di l’originali. Nta “Ora comu poti sì gran donna intrari,” l’amuri assumi na connotazioni quasi suprannaturali. Di Lentini si dumanna comu l’immagini dâ so amata pozza trasiri tramiti li so occhi e dimurari dintra d’iddu. La paragona a na lanterna lucenti la cui luci passa pi l’occhi e trasi ntô so cori.

Nta “Multi amaturi la so malatia,” l’amuri diventa na malatia sigreta. L’amanti soffri a l’internu mentri manteni n’apparenza esterna di normalità mentri duna lu cori e l’arma a la so Madonna. Attraversu ottu seculi, la difficili situazioni emotiva resta ricanuscibili.

Sta accessibilità è unu dî punti di forza dû libbru. Cipolla duna ô litturi cumuni puisii di apprizzari, furnennu ô studiusu chiù attentu n’argumentu stimulanti supra la lingua, la trasmissioni dî manuscritti e l’origini dâ littiratura taliana.

Chistu è lu volumi XXIV dâ cullana “Pueti d’Arba Sicula”, didicata a purtari la puisia siciliana ô munnu anglofonu. Chî sò 76 paggini, lu volumi invita li litturi a ricunziddirari li funnamenti linguistici supra cui si costruiu la storia dâ littiratura taliana.

Cipolla conchiudi lu so profilu di di Lentini esprimennu la so soddisfazioni pi aviri datu a Jacupu na vuci siciliana. Chistu è propriu lu meritu dû libbru. Setti seculi doppu ca dda vuci fu oscurata, Cipolla ni invita ad ascutarila di novu.