Noti di littura su “Giacomo da Lentini’s Sonnets Retranslated into Sicilian.” Intenzioni e traduzioni di Gaetano Cipolla

di Marco Scalabrino
tradottu di l’originali pubblicatu lu 28 giugnu 2026 nta: Sentieri di Cartesensibili

In apirtura, doppu lu summariu, la riproduzioni di na paggina d’un manuscrittu raffiguranti l’incipit dâ famusa canzuna ‘Madonna dir vi voglio’, pubblicata di Legas in New York, stu volumi consta di ottanta facciati, in sicilianu, in nglisi e in … ‘toscano’.

“Cui era Jacopu (o Giacomo) di Lentini?” ni addumannamu.

In virità nun canuscemu assai dâ sò vita, eccettu quantu si pò deduciri dî sò scritti.

Sapemu ca nascìu attornu ô 1210 a Lentini (SR), pirchì iddu stissu ni fici cennu ntâ sò canzuna “Miravigghiusamenti”; sapemu ca fu nutariu ô sirvizziu di lu mpiraturi Federicu II, giacchì atti, littri e àutri documenti priparati d’iddu portanu la dicitura “Jacobus de Lentini domini imperatoris notarius” o comunqui àutra iscrizioni simili ca identifica la pirsuna ca ddi atti scrissi (e chissu, perautru, chiarisci e susteni l’usanza ca cuntinuò nzinu a oggi di chiamarlu “Nutaru”); nun sapemu viceversa, cu cirtizza, la data e li circustanzi dâ morti, ma è prisumibili ca idda avvinni prima dû 1250, l’annu dâ morti di lu mpiraturi.

Jacopu di Lentini e li pueti dâ Scola Siciliana — un gruppu di circa 25 pirsuni a l’iniziu dû XIII seculu â Curia mpiriali di Federicu II — introdussiru in Italia la puisia pruvenzali. Scritta in occitanu, ciurita nta l’Europa settentriunali grazzii ê truvaturi ca viaggiavanu di na curti a l’àutra, solitamenti accumpagnata di musica e di cantu, idda avìa divintatu difatti assai pupulari. Li pueti dâ Scola Siciliana introdussiru, sì, in Italia tali puisia, la traduceru ntâ lingua parrata â curti di Federicu II, la affinaru tramitii lu sò maturu menzu espressivu e tuttavia ci appurtaru un basilari mutamentu: ridussiru, ovveru, l’aspettu dâ rappresentazionii dî truvaturi, eliminannu la musica e lu cantu ca accumpagnavanu li testi, e cuncintrarunu la sò attinzioni supra la puisia e in particulari supra un unicu tema d’idda, chiddu di l’amuri, modificannu quasi ogni autra cosa.

Lu tema di l’amuri divintau accussì grazzii â Scola Siciliana, e cuntinuau poi a essiri pî pueti dû “Duci Stil Novo” e successivamenti pi Petrarca e Boccaccio e puru pî pueti dû Rinascimentu, lu tema principali. Pî pueti dâ Scola Siciliana, l’amuri cumpurtava sirvizziu e ubbidienza a ogni disìu dâ donna singaliata, ntâ spiranza ca â fini idda li ricumpinzassi chî gioia di l’amuri; ma lu cuncettu d’amuri e lu rolu dî donni si trasfurmaru a picca a picca di generazioni in generazioni.

Notoriamenti accreditatu comu lu nventuri dâ forma metrica dû sonettu, Jacopu di Lentini fu probabilmenti lu pueta chiù mpurtanti a l’alburi dâ puisia taliana e a iddu si attribuisciunu, oltri ê 22 sunetti certi, midemma 16 canzuni di variu schema metricu.

Chistu dittu, pirchì stu travagghiu, quali ni è lu sensu? Gaetano Cipolla sudisfa stu nostru ntirrugativu senza equivocari. E nondimenu, prima di sentiri li sò cunsidirazioni, pirmittimi di dari na succinta duvirusa nota bio-bibbliografica.

L’organizzazioni culturali miricana Arba Sicula, dâ quali Gaetano Cipolla è l’anima, ntô corsu di l’ultimi 40 anni, didicau ogni sò energia â promozioni dâ lingua e dâ cultura siciliana ntô munnu. Già prufissuri di lingua e littiratura taliana pressu varii università miricani, la St. John’s University di New York pi urtima, natu in Sicilia ntô 1937 e emigratu ntî Stati Uniti ntô 1955, prisidenti di l’associazioni miricana “Casa Sicilia”, prisidenti e diritturi di Arba Sicula, rivista bilingui ca ospita articuli in nglisi e sicilianu, e dû periodicu Sicilia Parra, ambasciaturi culturali dâ Reggioni Sicilia ntô munnu, vincituri di pristiggiusi premi tra li quali lu “Telamone”, lu “Trinacria d’argentu” e lu “Proserpina”, Gaetano Cipolla havi lu meritu di aviri traduciutu in nglisi e diffusu in U.S A. e ntô munnu l’opiri di parecchi pueti siciliani e tra d’iddi: Nino Martoglio, Giovanni Meli, Antonio Veneziano, Nino Provenzano, Vincenzo Ancona, Senzio Mazza, Nino De Vita, Piero Carbone, Salvatore Di Marco, Maria Nivea Zagarella e Marco Scalabrino.

La Scola Siciliana rapprisintau l’iniziu dâ littiratura taliana, dâ littiratura ossia scritta nta na lingua italica diversa dû latinu. Pruvinienti di vari reggioni d’Italia, ô sirvizziu dâ curti di Federicu II, li pueti dâ Scola Siciliana scrivevanu tutti in sicilianu. La lingua d’iddi utilizzata divintau accussì lu standard pâ puisia in tutta Italia e ni stabiliu lu canuni littirariu; tant’è ca Danti Alighieri, ntô sò De Vulgari Eloquentia, ni ricanusciu l’impurtanza e affirmau ca tutta la puisia scritta in Italia era in sicilianu.

“Purtroppu,” si rammarica Cipolla, accussì vinennu ô nuzulu dâ quistioni, “la produzioni dâ Scola Siciliana nun arrivau a nui ntâ sò forma originali. Câ morti di Federicu II, ntô 1250, tutta la puisia originali prodotta dî pueti dâ Scola Siciliana si pirdiu; zoccu ristau sunnu li diversi ricoti di manuscritti copiati verosimilmenti di àutri copi”. Li chiù mpurtanti di iddi sunnu: lu Vaticanu Latinu 3793, lu manuscrittu chiù riccu di puisia lirica italiana antica cunservatu ntâ Bibblioteca Apostolica Vaticana; lu Laurenzianu rediano, pressu la Bibblioteca Medicea Laurenziana di Firenzi; lu Palatinu 418, ora dittu Bancu Rari 217, cunservatu a Firenzi pressu la Bibblioteca Nazziunali Centrali.

Era prassi di l’amanuensi copiari testi scritti nta nautra lingua adattannuli â propria, accussì di rennirli chiù accessibili e cumprinsibbili ê sò litturi. La puisia dâ Scola Siciliana è accussì supravvissuta ntâ forma modificata di l’amanuensi, provenienti chisti in larga parti di Firenzi, di Pisa e di Venezia. Lu sò contributu s’appalisava ntî scelti linguistichi ca adottavanu. Pirchì l’amanuensi nun si limitavanu a canciari la desinenza dî palori o a sustituiri na palora cu nautra: producevanu di fattu dî testi ca eranu chiù na traduzioni ca na mera copia, applicavanu li reguli ca caratterizzavanu la sò lingua ê puisii dâ Scola Siciliana; a tali puntu ca, in assenza dî puisii originali, li copii fatti di l’amanuensi â fini nun eranu poi tantu dî stissi puisii scritti origginariamenti in toscanu, in pisanu o in venezianu.

Benintisu, lu compitu di circari di dicifrari lu testu originali dû puema sicilianu ci criau, spissu, problemi di difficili soluzioni. Binchì la sostituzioni dî palori siciliani in rima putissi pariri a prima vista n’operazioni agevuli, tanti foru li difficultà ca l’amanuensi appiru ad affruntari nta l’adattari lu sicilianu ntâ sò virsioni “toscana”.

“Sta osservazioni”, rileva Gaetano Cipolla, “è pienamenti estensibili a mia. Non c’e bisognu di dirlu ca lu sicilianu di oggi è diversu di chiddu du XIII seculu; comunqui usannu li desinenzi siciliane, limitannu l’usu du l’apocopi, e facennu ddimudifichi ca bastanu ristannu fideli a li refuli di la lingua sicilian, criju d’aviri avanztu punti a favuri di stu mè travagghiu. Ntô mè tentativu di ricostruiri la lingua originali dâ ‘Scola’ — pû quali esaminai sia li testi di l’amanuensi cunzirvati nta diversi città comu puru li traduzzioni di originali ad oggi reperibili — appi a affruntari, comu l’amanuensi, tanti fatturi di difficultà e nun pochi dubbi si suscitaru supra li scelti di fari. Ma li sforzi fatti pi ricupirari zoccu eranu li puisii originali foru comunqui ricumpinzati — fussi sulu pi ricatturarinni li soni, la musicalità e lu ritmu. Lu risultatu di n’opirazioni di stu geniri poi nun riproduciri li testi esattamenti comu eranu originalmenti, ma iddi certamenti nun sunirannu toscani, nè pisani nè veneziani; sunirannu comu la lingua ca la maggior parti dî siciliani canusci comu propria. E tali miratu canciamentu mittirà in luci li pueti dâ Scola Siciliana e ci ridarà lu meritu di aviri criatu lu canuni littirariu talianu.

“La moli di studi didicati â ricostruzioni di ddi testi circau di culmari li lacuna prisenti ntî manuscritti, circau di ragghiunciri un consensu condivisu supra lu sò significatu, ci desi lu duvutu pristiggiu, benchì diversi edizioni offrunu testi nun di tuttu identici e spissu, anzi, diffirenti tra d’iddi in manera sustanziali. Ammatula li alterazioni appurtati ô testu sicilianu originali di l’amanuensi e dî diversi àutri successivi ricostruzioni compiuti, lu nucliu essenziali dî puemi ristau, quinni lu putemu usari pi ricriari un testu ca s’avvicina quantu chiù ô pinzeru originali di l’autori.

“La mè ritraduzioni in sicilianu dû testu juntu finu a nui (di fattu si tratta di na traduzioni e nun l’originali cu tutti li preggi e li difetti derivanti di l’opira di l’amanuensi ca ni curau l’adattamentu) sarà pirciò,” prosegui Cipolla, “valida in sè, valida quantu li traduzzioni toscani o veneziani e havi a essiri giudicata in basi â sò bontà, ê sò meriti.

“Li tradutturi antichi appiru lu vantaggiu di travagghiari supra l’originali e comunqui na traduzioni nun è mai na copia esatta, giacchì tra lingui diversi li palori sunnu li vocabbuli non sunnu mai sinonimi. Lu tradutturi in pratica, ntô sò dilicatu tragghiu, si trova postu ntô beddu menzu di n’altalena e cu ogni sò forza si barcamena in modu di manteniri lu giustu equilibriu tra li dui estremità, di conciliari lu significatu di na palora o di n’espressioni di tutti dui li banni.

“Li bravi tradutturi”, stima Cipolla “rinesciunu a trasmettiri lu sensu veru di na puisia; l’amanuensi, ntâ maggior parti dî casi, ci rinisceru ed è chiddu ca mi ripromisi di fari puru jo. Pur nun essennu identichi a l’originali, li mè virsioni siciliani, na sorti di traduzzioni inversa, sunnu la ricriazioni prossima quantu chiù possibili a chiddu ca lu testu originali puteva essiri. Fu un compitu difficili; ma, doppu lu primu soddisfacenti tentativu di ritraduzioni di una dî canzuni di Jacopu di Lentini, pâ pricisioni ‘Miravigghiusa-menti’, mi ntisi sprunatu a tintari l’operazioni supra na scala chiù granni Li virsioni — ca venunu offerti nta stu mè volumi — putissiru, comu dissi prima, nun essiri esattamenti chiddi ca Jacopu scriviu, ma cridu ca l’oscillazioni di la me altalena nun jiu nè troppu in autu nè troppu in basciu”.

Comu lu stissu Danti ricanusciu nta na pagina dû sò De Vulgari Eloquentia: “La lingua ca [li membri dâ curia – funzionari, diplomatici, nutari, pueti e scienziati — e puru lu stissu mpiraturi] parravanu era illustri, rigali, aulica”. La lingua di Jacopu, allura, era ben cumplessa e pi cunziquenza la traduzioni oggi in sicilianu dî sò puisii a opira di Gaetano Cipolla prisintau nutevuli difficultà, pi di chiù valutannu ca iddi usavanu assai vucabbuli di dirivazioni stranera ca nun sunnu poi ntrasuti a fari parti dû linguaggiu dû populu, ca nun hannu risistitu â prova dû tempu e nun sunnu difatti cuntimplati nta li vocabbulari siciliani.

“Nun pretennu”, conchiudi Cipolla, “di aviri miracolusamenti ripurtatu li puisii di Jacopu di Lentini ntâ sò forma originali, giacchì, comu gia dissi, na traduzzioni nun pò mai riproduciri di tuttu fedelmenti ntâ forma un testu scrittu nta nautra lingua; e poi, a l’iniziu, nun mi vinni mai mancu in menti l’idea di traduciri tutta la puisia di Jacopu! Ô principiu fu un eserciziu pi mettiri â prova la mè cunvinzioni ca la vasta produzioni dî pueti dâ Scola Siciliana putissi essiri in parti ripurtata a chiddu ca forsi era prima ca la pulviri dû tempu la custrincissi a parrari cu nautra vuci o la cunfinassi ô silenziu. Mi parsi un veru piccatu ca li pueti dâ Scola Siciliana, a cui veni attribuitu lu meritu di essiri stati li primi a usari la sò lingua in puisia facilitannu d’accussì la nascita dâ littiratura taliana, nun abbianu avutu la giusta cunsiddirazioni. Cunfidu ca li mè traduzzioni inversi, la littura dî mè virsioni siciliani cuntinuti nta stu libbru (2 canzuni e 30 sonetti di cui 2 di dubbia attribuzzioni, nun tanti testi si si teni cuntu ca l’opira di Jacopu, capu ricanusciutu dû gruppu, e assai chiu mpurtanti di chidda di tutti l’àutri) pozzanu ispirari a àutri pirsuni a leggiri e a apprizzari chiù la sò opira; di parti mia, sugnu filici d’aviri ridatu a Jacopu di Lentini na vuci siciliana”.

In appendici ripurtati in toscanu “Meravigliosa-mente”, “Ben m’è venuto, prima, cordoglienza” e àutri sunetti, Stamu pi chiudiri sta brevi nota c’un unicu emblematicu esempiu, unu dî sunetti chiù celebri di Jacopu di Lentini, un omaggiu â fimmina ca prisenta originalità, metafora e religioni.

Eu m’aju misu in cori a Diu sirviri

Eu m’aju misu in cori a Diu sirviri,
com’eu putissi jiri in paradisu,
ô santu locu, c’aju intisu diri,
unni s’havi sollazzu, jocu e risu.
Sanz’a me donna non vi vurrìa jiri,
chidda c’à testa biunna e claru visu,
ca sanza idda non putirìa gaudiri,
ristannu di la mia donna divisu.
Ma no lu dicu a tali intennimentu,
pirch’eu piccatu ci vulissi fari;
si non vidiri lu so purtamentu,
lu beddu visu e morbidu guardari:
chi mi tirrìa in gran cunzulamentu,
vidiri la mia donna in gloria stari.

I Have Decided to Serve God, Our Lord

I have decided to serve God, our Lord,
so I may earn a place in Paradise,
that holy realm that I have often heard
merriment, laughter and great joy supplies.
Without my lady, though, I would not go,
the one who has blond hair and a bright face,
because without her I just would not know
what joy is, were she in another place.
But I do not say this because I mean
to act with her in sinful or immoral ways,
I simply want to see her noble mien,
her lovely face, and her soft, loving gaze:
for it would be for me so very keen,
to see my lady basking in such praise.

Io m’aggio posto in core a Dio servire

Io m’aggio posto in core a Dio servire,
com’io potesse gire in paradiso,
al santo loco, c’aggio audito dire
o’ si mantien sollazzo, gioco e riso.
Sanza mia donna non vi voria gire,
quella ch’à blonda testa e claro viso,
che sanza lei nom poteria gaudere,
estando da la mia donna diviso.
Ma no lo dico a tale intendimento
perch’ io pecato ci vellesse fare;
se non veder lo suo bel portamento,
e lo bel viso e ‘l morbido sguardare;
che ‘l mi teria in gran consolamento,
veggendo la mia donna in ghiora stare.