Jacopu di Lentini

Ridari la vuci siciliana a Jacopu di Lentini: Gaetano Cipolla pubblica na ritraduzioni dî sonetti dû “notaru”

Cu Giacomo da Lentini’s Sonnets Retranslated into Sicilian, editu di Legas Publishing, lu prufissuri e studiusu Gaetano Cipolla pruponi na coraggiusa operazioni culturali: ristituiri ê versi dâ capuscola dâ Scola Siciliana na forma linguistica siciliana.

di Accademia della lingua siciliana
adattata di na recensioni di Marco Scalabrino

A distanza di ottu seculi dâ nascita dâ Scola Siciliana, Jacopu (o Giacomo) di Lentini torna idealmenti a parrari ntâ lingua dâ sò terra, ntâ sò lingua materna: lu sicilianu. È chistu l’obbiettivu dû novu volumi Giacomo da Lentini’s Sonnets Retranslated into Sicilian, curatu e tradottu di Gaetano Cipolla e pubblicatu di qualchi misi di Legas Publishing di New York. “Lu fattu ca li pueti dâ Scola Siciliana parranu toscanu è na cosa nun accittabili dû mè puntu di vista”, dici Cipolla. “Lu mè proggettu fu chiddu di ridari a Jacopu di Lentini la lingua nativa”.

Lu libbru, di ottanta pagini, si apri câ riproduzioni di na paggina manuscritta cuntinenti l’incipit dâ celebri canzuna “Madonna, dir vi voglio”, offrennu dî primi pagini na suggestiva immersioni nta l’origini dâ puisia in Italia. Li testi sunnu prisintati in tri virsioni: sicilianu, nglisi e “toscanu”, consentennu ô litturi di cunfruntari direttamenti li diversi tradizioni linguistichi.

Figura cintrali dâ curti di Federicu II, Jacopu di Lentini è universalmenti ricanusciutu comu l’inventuri dû sonettu e lu principali esponenti dâ Scola Siciliana, lu muvimentu pueticu ca ntô XIII seculu misi li basi in Italia dâ littiratura in vulgari. Notaiu imperiali, autori di vintidui sonetti certamenti attribuiti e di sidici canzuni, introduciu nzemmula a l’àutri pueti dâ curti fidiriciana l’usu sistimaticu dû vulgari in Italia pi na produzioni littiraria di qualità. La Scola Siciliana cunsacrò lu tema di l’amuri comu fulcru dâ puisia taliana, esercitannu n’influenza distinata a ragghiunciri lu Duci Stil Novo, a Petrarca e tutta la tradizioni rinascimintali.

Lu volumi di Cipolla affronta unu dî problemi chiù affascinanti dâ filologia midievali: la “perdita” di l’originali siciliani. Doppu la scunfitta dâ dinastia sveva câ battagghia di Beniventu dû 1266 e la conquista angioina dû Regnu di Sicilia, l’opiri dâ Scola Siciliana foru quasi interamenti distrutti. Zoccu oggi canuscemu diriva di copi rializzati di amanuensi, suprattuttu toscani, ca adattarunu sistimaticamenti la lingua dî testi â propria parrata. Chiù ca simplici trascrizioni, ddi copi foru veri e proprii traduzzioni linguistichi ca mudificaru prufunnamenti la facci originaria dâ puisia siciliana, tant’è ca certi rimi nun cumbaciavanu chiù.

È propriu supra sta cuscenza ca si funna lu travagghiu di Gaetano Cipolla. Attraversu un attentu cunfruntu tra li principali manuscritti midievali, lu studiusu tintau na “traduzioni inversa”, ripurtannu li testi in un sicilianu modernu ca, pur senza pritinniri di coincidiri perfettamenti cu chiddu dû XIII seculu, ristituisci ê versi sonorità, ritmu e musicalità ricunducibili â sò matrici originaria.

“L’obbiettivu”, spiega Cipolla, “nun è ricostruiri miracolusamenti l’originali pirduti, ma offriri na virsioni ca nun sona toscana bensì siciliana, ristituennu ê pueti dâ Scola lu meritu di aviri criatu lu primu canuni dâ littiratura taliana”.

Ntô volumi trovanu spaziu du’ canzuni e trenta sunetti — dui dî quali di dubbia attribuzzioni — accumpagnati dâ traduzzioni nglisi. In appendici sunnu puru ripurtati certi testi ntâ tradizioni toscana, pirmittennu ô litturi di cogghiri immediatamenti li differenzi linguistichi e stilistichi.

Tra li cumpunenti chiù significativi figura lu celebri sunettu “Io m’aggio posto in core a Dio servire”, propostu ntâ nova virsioni siciliana “Eu m’aju misu in cori a Diu sirviri”, allatu â traduzioni nglisi e ô testu tramannatu dî manuscritti toscani. Un esempiu emblematicu di l’impostazioni editoriali dû volumi, ca intenni offriri ô stissu tempu nu strumentu di studiu e na riscuperta littiraria.

Di chiù di quarant’anni Gaetano Cipolla rapprisenta una dî figuri chiù autorevuli ntâ promozioni internazionali dâ lingua e dâ cultura siciliana. Natu a Francavilla di Sicilia ntô 1937 e emigratu ntî Stati Uniti ntô 1955, fu prufissuri ordinariu di lingua e littiratura taliana â St. John’s University di New York, e attualmenti è membru dû Culleggiu Scientificu di l’Accademia dâ Lingua Siciliana, oltri ô prisidenti di Arba Sicula e diritturi dî rivisti Arba Sicula e Sicilia Parra. Ntô corsu dâ sò attività traducìu in nglisi numirusi autori siciliani, di Giovanni Meli a Nino Martoglio, di Giuseppe Fava a Antonino Provenzano, contribuennu in manera decisiva â diffusioni dâ littiratura siciliana ntô munnu.

Cu sta nova pubblicazioni, Cipolla junci un tasseddu mpurtanti ô dibattitu supra la ricostruzioni dâ lingua dâ Scola Siciliana, riaffirmannu lu rolu storicu dû sicilianu comu prima lingua dâ produzioni poetica sistimatica in Italia e nvitannu a studiusi e litturi a riscopriri a Jacopu di Lentini nun sulu comu inventuri dû sonettu, ma comu pueta ca, grazzii a sta “vuci ritruvata”, pò ancora parrari cu surprinnenti attualità.

tradottu di l’originali pubblicatu lu 22 lugliu 2026 nta:

di sutta c’è un lijami â recensioni chiù longa di Marco Scalabrino (28 giugnu 2026):